ኢትዮጵያዊነት ስንል …

በብሔራዊ ማንነታችን ማለት በኢትዮጵያዊነት ሰንደቅ ዓላማ ስር መሰለፍ ቅድሚያ ተስጥቶት፣ ግላዊና ቡድናዊ ልዩነቶቻችን (ማለት የትውልድ ቦታ፣ ጎሳ፣ ሐይማኖት፣ መደብ፣ወዘተ) ግን ሳይረሱ በሁለተኛ ደረጃ የሚታዩበት አመለካከት ማለታችን ነው።

የስልጣን ሉዓላዊ ባለቤትነት የኢትዮጵያ ሕዝብ እንጅ የመንግስት ስላልሆነ የማይገሰሱ አርነቶችና ነጻነቶች የሚከበሩበት የዲሞክራሲያዊ ስርአት ግንባታ ምኞትና ራእይ ማለታችን ነው።

አገራችንን ከአቻዎቿ ልዩ ከሚያደርጓት ባሕርይዎች አንዱ በኢትዮጵያዊነት ቃልኪዳን የተመሰረተ የዜጎቿ ጽኑ እምነት ነው፤ ስለዚህ የወደፊቱ ትውልድ የዲሞክራሲያዊና የበለፀገች ኢትዮጵያ ባለቤት የሚሆነው ሁላችንም መብቶቻችንን ስናስከብርና ግዴታዎቻችንን ስናከብር ነው ማለታችን ነው።

የኢትዮጵያ አለም-አቀፋዊ ሉዓላዊነቷና የሕዝቦቿ አንድነት የሚከበሩበት በተለይ የአዲሱን ትውልድ መለያ ሰንደቅ ዓላማ ማለታችን ነው።

ኢትዮጵያዊያን ኑሯቸውን በሚመለከቱ ፓለቲካዊ፡ኢኮኖሚያዊና ማህበራዊ ዘርፎች በሚደረጉ ምርጫዎችና በሚወሰዱ እርምጃዎች ሁሉ ሙሉ ተሳትፎ የማድረግ ማሕበራዊ ሃላፊነታቸውን ሲወጡ ሰላማዊ፡ዓለም-አቀፋዊና ሁለገብ መንገዶችንና ስልቶችን ይቀይሱ ማለታችን ነው።